MNF MLA Pu Lalruatkima chuan nimina Bairabia Tlawng lei chim chu Congress sorkar hnuh chim a ni, a ti a, Tlawng lei chu 2008 atanga dawh tan tawh, kum 6 kal taa dawh zawh tura tih a nih thu sawiin, a hnu zelah Revised Estimate tum 3 siam a ni leh tawh a, an hnuk muang nasa lutuk a, an hnuk chim a ni, a ti.
Pu Lalruatkima chuan Tuipui D Darzo kai lei an dawh mek a chim a, Sihhmui lei tum 3 zet a chim tawh bawk a ni, a ti a. Sihhmui lei dawhthatna tur hi Ministry of Road Transport & Highway chuan sorkar-in pawisa a dil nuai 290 chuang chu nikum khan an rawn pe daih tawh a, mahse lei dawh that nan hian an la hmang lo a ni, a ti bawk.
ZNP President Pu Lalduhoma chuan Bairabi bula Tlawng lei dawhlai mek a chim leh ta mai chu a lungchhiat thlak hle a ni a ti a, Congress sorkar hnuaiah lei tam tak a chim a, Airport panna kawngpuia Tlawng lei phei chu vawi hnih lai a chim tawh a ti a, he lei dawh hna hi kum 2007, MNF sorkar laia pek a ni tih sawiin, kum riat chhung pawhin dawh zawh a ni lova. Fur ruahtui tam vanglai taka lui lai tak, tui zangkhauh luanna lai taka chhe mai tura hna thawh a ni hian a chhiat ngei ring sa a, lei dawh hun tur extend nawn lehzelna tur leh senso tur revised leh beiseia thil tih luih a ang viau a ni, a ti.
Pu Lalduhoma chuan, Congress leh MNF sorkarah company rintlak tak hna pek an ni ngai lo ni a sawiin, Mizoram khawthlanglam leh airport neihchhun kalpawhna kawngpui ber, Rangvamuala leimin avanga kawngping reng mai sorkarin a sial kaw hlei theilo ringawt pawh a zahthlak a ni a ti.
BJP Mizoram Pradesh chuan pawi tunhnai maia Mizoram chhung hmun hrang hranga lei chim thleng thin chu thawktu Department leh Contractor-te inthlah dah vangah an ngai tih an sawi a, Sorkar chu mipuite hmakhua ngailo ah puh in, lei chim chhan dik tak chhui chhuakin state dang sorkar ten an lo tih thin dan angin a thawktu Contractor leh Department te thubuai siamsak nghal turin an phut tih an sawi a ni.
Bairabi Tlawng lei chim ta hi 2008 atanga ABCI dawh tan tawh zawh hun pawh vawi tam tak tih khawtlai leh pek belh tawh ani tih sawiin, Kolasib leh Mamit District MJA-ten hnathawh muan vanga Contractor chu Legal Notice pek hiala an lo vau a ni tawh a ni an ti a ni.
Puan tawh angin, he lei hi ABCI te’n an dawh mek, nimin chawhma dar 10 leh minute 25-a chim a ni a. He lei pumpui, cement concrete-a double lane tura siam leh metre 160 a sei turah hian metre 120 chin chu a chhuat chhun zawh tawh a ni a. Lui lai zawna metre 40 a sei a chhuat tihnghehna tur an chhun mek a ni a, A hnuai lama a dona thir ban zawm khawm chu tuilianin a len hnawl tang vanga chim a ni tih Engineer Pu K. Lalsawmvela chuan a sawi a ni.
Tun tum tuilian hi a nasa hle nia sawiin nikum fur-a a len lai bera a chim chin ai khan feet 4-in a chim a sang zawk niin a sawi a. Tuna a len chhiat bak a dang zawng chu a la him niin a sawi bakah he lei dawh hna hi kumin June thlaa zawh tura ruahman niin a sawi bawk.
