Forensic Science Laboratory -ah case sing sarih chuang endik tawh
27th May, 2016 (MSR) : Mizoram Forensic Science Laboratory (FSL)-ah kum 2000 atanga April 2016 thleng khan thubuai 6,693-ah thil chi hrang hrang 71,357 an endik tawh.
Kum 2015 chhung bik khan FSL hian thubuai 1060-ah thil chi hrang hrang 5,256 an endik a, chuta tang chuan an endik result 558 chu Court-ah an thehlut. Nikum chhung vek khan FSL hnathawkte chu thil thlenna hmun 110 endik ngaite endik turin an kal.
Kum 2000 atanga kumin 2016 inkar chhunga FSL-in thubuai an khawih hnem ber tum chu 2014-ah niin, thubuai 1,154 an khawih a, hemi kum vek hian an thil endik tam ber kum a ni bawk a, thil chi hrang hrang 18,614 an endik a ni.
An thil endik result hi FSL hian a tul angin Court-ah an thehlut thin a, an thehluh tam ber tum kum 2015 ah 538 an thehlut a, hetihlai hian FSL hian finger print pawh an la thin a, finger print hi 5,500 an la tawh a ni.
Kumin 2016 chhung bik ah April 30 thleng khan FSL mithiamte chu pawikhawihna thlenna hmun 36 ah an kal tawh a, thubuai 217 khawih tawhin, thil chi hrang hrang 1,615 an endik tawh a, hemi atanga an endik result 61 chu court ah an thehlut tawh bawk.
FSL office-ah hian chhuifiahna khawl pasarih an nei a, chungte chu mithiam pahnih zelin an enkawl a ni. Chemistry Division, Toxicology Division, Question Division, Fingerprint Division, Ballistic Division (puak thei thil, etc.), Sirology Division (thisen, chil, zun, etc.) leh Photography Division-te a awm.
Mizoram Forensic Science Laboratory hi kum 2000-a din a ni a, Police department hnuaiah hun eng emaw chen a awm hnuin, March 2015 atangin directorate puitlingah hlankai a ni a, tunah hian forensic expert 14-te'n department hrang hrang pasarihah inthenin hna an thawk mek a ni.
Forensic Science Laboratory hnuaiah hian DNA Laboratory pawh April 8, 2016 khan Home Minister R Lalzirliana chuan a lo hawng tawh a. Thudawn danin, DNA Laboratory hi India ram state 18 ah chauh ala awm a ni. Pawikhawihna chhui nana misual hnuchhui nana DNA phai lama thawn vanga hun rei tak tak nghah a tul thin chu DNA Laboratory hawn thar hian tibovin misual hnuchhui pawh a awlsam phah hle tawh ni a thudawn a ni.
