Nimina Commercial Vehicle Joint Action Committee (CVJAC) meeting ACBOA Office, Ngaizela neihah CVJAC chuan Lirtheia Eizawng tuten harsatna an tawh tun thlenga Sorkarin a la chinfel sak duh lo chu hriatthiam harsa an tih thu an sawi a. "Sorkarin kan harsatna chinfel vat tura insawi si a, min ngaihsak rang duh leh silo hi pawi kan ti khawp a, ngaihthiam harsa pawh kan ti a ni. Sorkar Official ten min kohin kan harsatna lam min sawipui tum lam aiin thingpui inah leh hruaitute inhmelhriattirna ang chauha inkawm kan nih chauh thin thu min hrilh te hian kan harsatna min chinfel pui tak tak an tum lohah kan ngai a ni" an ti a.
Tun dinhmunah hian Mizoram Sokarah Zu chhiah tih lohah chuan Commercial Vehicles te hi Chhiah chhunglut tam ber an nih thu CVJAC chuan an sawi a. "Heti chunga Chhiah petu ( Taxs Payer) ten harsatna leh buaina kan neih ve min ngaihsak duh lo hi na kan ti a ni" an ti bawk.
Lirthei hmanga eizawng pawl CVJAC te chuan "kan Chief Minister hi vawi thum lai kan hmu tawh a, tha takin min lo dawnsawng thin a, ruahmanna te min lo siampui thin avangin lawmawm kan ti a, amaherawh chu heti chunga Transport Dept lam changtu te leh a hnuaia Official ten min uksak chuang lo leh CM ruahmanna siam te an tih hlawhtlin sak duh loh thin bakah kan harsatna tawh te a rang lama min chinfel sak an tum chuan loh avangin District hrang hranga Commercial Vehicle te chuan ni 18th May 2016 zing dar 5:00am atang chuan loh theih loh avangin tiam chin awm loin lungawi lohna lantir nan Mizoram pumah Commercial Vehicles Lirthei te chu tlan chhuah lo turin kan in hriattir ta a ni" an ti.
Sorkarin kan harsatna min la chinfel pui loh avanga loh theih loha Commercial Vehicles Lirthei ten lungawi lohna an lantir dawn avanga buaina tawk palh te an awm chuan mipui hriatthiamna an dil nghal thu an sawi bawk.
Commercial Vehicle Lirthei te lungawi lohna neih chhung hian Bawlhhlawh paih Motor emaw Dawr Bungraw sem motor leh mimal thil atana hman Commercial Vehicle anga Registration hmang te pawh tlanchhuah loh tur a ni a. Hetih hunlai tlanchhuak lui awm te chuan harsatna leh buaina an tawh pawhin an mahni mawhphurh a nih tur thu CVJAC te chuan an sawi a, Bawnghnute phur leh sem motor te chu hriatthiam an ni ang.
