State Election Commission (SES) ruahman dan chuan vote hi vawiin tlai dar 5 thleng thlak tur a ni a, vote thlak zawh fel veleh vote tlate hi chhiar zui nghal tur a ni.
Saikao-ah hian voter 391 awmin heng zinga 198 chu hmeichhia an ni a, VC General Seat 4 leh Reserved seat 1 a awm a, General Seat hi mi 8-in an chuh a, Reserved Seat hi mi 2 in an chuh a ni.
Theiri-ah chuan Voter 385 awmin heng zinga 198 chu hmeichhia an ni a, VC General Seat 4 leh Reserved Seat 1 a awm a. General Seat hi mi 8-in an chuh a, Reserved Seat chuhtu 2 an awm bawk.
Lotai-ah chuan voter 241 an awm a, hmeichhe vote nei 123 awmin, VC General seat 3 leh reserved seat 1 a awm a, General seat hi mi 6-in an chuh a, Reserved seat hi mi 2-in an chuh a ni.
SEC chuan inthlanna thianghlim leh felfai a awm theih nana thawk turin vote nei zawng zawngte an sawm tih an sawi a; inthlanna huam chhunga vote neiten kim taka vote an thlak theih nan Governor-in vawiin chawlh a puang a ni.
Hetihlai hian, Aizawl leh Kolasib District-a Village Council By-Election neih zawh taka member thlan tharte chu tun thla ni 31 aia tlai lovah Village Council Executive Body siam fel vek turin SEC-in a hriattir a. Thla thar ni 1-ah Village Council thar ten charge la felin Returning Officer kaihhruainain Sitting hmasa ber neih vek tur a ni.
Chak bik awm lohna leh harsatna eng emaw bik avanga hun tiam chhunga Executive Body siam thei lote chuan acting Village Council President an siam ang a, acting Village Council President te chuan June ni 1-ah Village Council charge an la tur a ni a, ni 6 hmain Village Council Executive Body an siamfel ngei tur a ni.
