Aizawl khawpuia taxi-a eizawng tem Chief Minister leh transport Minister tawngkam helhhelh
2nd June, 2016 (MSR) : Aizawl Taxi Workers Union chuan nimin khan Aizawl Press Club-ah chanchinbumite kawmin Mizoram Commercial Vehicle Jount Action Committee-ten lungawi lohna leh an duhte tipuitling tura sawrkar an kar nana motor a sumdawngte tlan lova nawrhna an neih laia Chief Minister Pu Lal Thanhawla leh Transport Minister Pu John Rotluanglianaten taxi-a eizawngte tham lo leh hmusit taka tawngkhum nia sawiin na an tih thu an sawi.
Aizawl Taxi Workers Union President Pu Raphael Lalrinmawia chuan Chief Minister leh Transport Minister-in lirtheia eizawngte tham lo leh hmusit taka mahni hmasaial, duham leh midangte tana kawng kian duh lo anga a tawngkhum chu a na a, ramhruaitu leh mi puilting thusawi atan a mawi lo tak mai mi pangngai sawi awm tawk an mahni meuhin an sawi chu a pawi tak zet a, Mizoram mipui hriatah taxi-a enzawngte laka ngaihdam dil turin an phut thu a sawi.
Aizawl Taxi Workers Union President Pu Raphael Lalrinmawia chuan February ni 11-a Chief Minsiter hnena taxi khalhtu ten harsatna an tawh hrang hrang an thlente chu tun thlengin chhana an la hmu lo a ti a, amaherawhchu hei hi Mizoram Commercial Vehicle Jount Action Committee-in CM hnena a thlen ang thote a nih avangin ATWU chuan a nawr zui lo a ti.
Passenger-ten Taxi an hire laia taxi driver thenkha ten hire-tu rawn lova passenger an lakbelh thin chungchang zawhna chu chhangin Passengser lak belh leh lak belh loh chu taxi hire-tu thu thu a ni a ti. Entir nan Passenger-in Rs.200-in taxi hire ta se kawng lakah damlo emaw hmanhmawh deuh passenger lakhebelh ta se passenser chuan Rs.50 a pek chuan hire-tu chuan Rs. 150 chauh a pe tawh thin a ti.
