Mizoram Merchant Association in AMC Reguation duhlo

Mizoram Merchants Association (MIMA)-in AMC Licensing Regulation chu ram leilung fate tana him lo nia ngaiin, AMC-a inziak lut lo turin dawrkai leh sumdawngte an ngen a, he dan hi thla thar ni 10 hma-a siam tha turin AMC an ngen bawk. MIMA kaihhruaina hnuaiah hian nimin khan sumdawng pawl hrang hrangte chu thu khawmin, AMC Licensing Regulation chungchang hi an ngaihtuah ho a, he dan hnuaiah hian ram leilung fate himna leh humhalhna dan a awm lo nia sawiin, Aizawl khawpui chhunga sumdawngte chu he dan hnuaia inziak lut lo turin an ngen a ni.

MIMA chuan, AMC Licensing regulation hnuaia inziaklut tura thil tel ngai,  lehkha pawimawhte chu hnam dangte tan pawh awlsam taka neih theih nia sawiin, Aizawl khawpuiah hnam dangin sumdawnna din duhin AMC-ah inziah luh tum ta se, dan theih an ni dawn lo niin an sawi a, AMC Licensing Regulation hmang hian hnam dang sumdawng, inziah luh tumte chuan AMC hi an khing lut thei hial dawn ni-a an ngaih thu an sawi. Mizoram Merchants Association chuan, AMC hnuaiah hnam dang sumdawngte an inziah luh a, dan ang thlapa an sumdawn theih dawn chuan Mizorama sumdawngte chu chim ral an ni thuai dawn niin an sawi a, hei hian ram leh hnam bakah sakhua thlenga chim ral hlauhawmah Mizoram leh Mizo-te chu a dintir dawn ni-a an ngaih thu an sawi.

MIMA chuan, AMC Licencing Regulations, 2012 hi thla thar ni 10 hma-a siam tha turin Aizawl Municipal Council chu an ngen a, he danah hian ram leilung fate himna tur zep tel ngei turin an phut a, AMC-in an ngenna a tihlawhtling lo a nih chuan dawr khar emaw, total bandh neih emaw, economic blockade emaw, a tul ang zela a tawp thlenga nawr an tum thu pawh an sawi a ni.