Aizawl, 2 April (TheAizawlPost):Assembly House-a minister-te thutiam en zuitu Committee on Government Assurance-in an 'report' danin, an en chinah minister-te thutiam tihhlawhtlin a la awm lo.
Budget Session liam taa he committee chairman R Vanlalvena'n report a thehluha a lan danin, intiamna panga bawhzui dan an en a, 2013-a mi daih te a ni tawh chungin tihhlawhtlin a la awm lo.
March ni 14, 2013-a R Lalrinawma zawhna, minister-in Muthi kawng black top tur a nih thu leh Aizawl-Lunglei Road National Highway a\anga Airfield panna tur black top tur a nih thua minister-in a chhanna chu tihhlawhtlin a la ni lo a, Muthi kawng chu sanction hmuh loh vanga thawh a la nih loh thu leh airfield kawng chu km 0.600 zawh tawh a nih thu, a bak chu pawisain a daih loh thu Committee report-ah chuan a lang.
March ni 25, 2013-a Nirumpam Chakma-in Damdep-ah LPG agent mamawh a nih thu a sawi, minister-in khawi emaw berah agent hi hawn belh a nih tur thua a chhanna pawh tihhlawhtlin a la ni lo a, "Agent dah belh chungchang hi IOC thuneihna a ni a. IOC lam te chuan agent dah belh tumna an nei rih lo," tiin report-ah an ziak. Hei hi department lamin an chhan dan a ni.
R Lalrinawma, TT Zothansanga, VL Robiaka, RL Pianmawia, Lalrinmawia Ralte, K Lianzuala leh Dr H Ngurdingliana te biala health sub-centre sak vek minister-in March ni 20, 2013 khan a tiam a, hei pawh tihhlawhtlin mumal a la ni lo. Sub Centre aiah Clinic Centre te hawn a ni a, chu'ngah pawh chuan thawktu an indaih lo.
"Health Sub-Centre leh Clinic Centre hi mamawhna avangin hawn belh zel a ni a, hengteah hian thawktu mamawh belh zel a ni a, amaherawhchu post thar siam belh hi sorkarin a remtih loh avangin leh pension leh boralte avanga post ruak awm lo awmte hnawhkhah theih a nih loh avangin thawktu hi kan indaih lo em em a ni," tiin department lam chuan Committee hnenah hian an thlen.
Khaw pasarihah Sub-Centre hawn phalna sorkarin a pek tawh thu report-ah chuan a lang.
March ni 26, 2013-a C Ramhluna'n Hruitezawl Rest House-ah furniture dah tum a nih leh nih loh a zawhna, minister-in dah tum a nih thua a chhanna pawh tihhlawhtlin a la ni lo.
July ni 28, 2013-a K Lianzuala'n Baktawnga Tourist Lodge sak tan hun tur a zawh, minister-in DPR siam a nih tawh thu leh 2013-14 chhunga sanction hi pe tura nawr mek a nih thua a chhanna pawh, ministry of tourism atanga sanction hi hmuh a la nih loh thu report-ah an ziak
