Mamit, 16 April: Thli tleh leh ruah surin tukin khan Mamit khawpui nuaiin, khawchhungah chhiatna engemaw zah a thlen a. Hemi chungchangah hian District Disaster Management Authority (DDMC) chu hmanhmawh taka thukhawmin chhawmdawlna hna thawh dan tur leh hmalak dan tur an rel nghal a ni.
Thli tleh leh ruahsur avang hian hriat theih china Mamit khawchhunga chhiatna thlen dan tlangpui te: In chhia (in chung lak leh bang chhia etc.) 90 vel awmin, in chhe vek 16 vel a awm a. Electric ban 9 a tlu a. Seventh Day biakin Mamit Hmar Veng a mi chu a chhe vek bawk a. Sorkar office, quarter leh school tam zawk pawh thli leh ruah sur hian a ti chhe bawk a, DCSO quarter phei chu luahtlak lohin a chhe bawk.
Chhiatna thlenna hmun hi Pi Lalbiaksangi,District Bawrhsap hovin DDMC member te leh Village Council member te'n tlawh nghalin, chhawmdawl hna an thawh nghal bakah tanpuina pawisa pekchhuah nghal maithei turin an ruahman bawk. 4th IR Bn, Luangpawl te'n hmanraw tha zawk nen chhawmdawl hna hi an thawk bawk a ni. Hriat theih chinah thi leh hliam an awmlo a ni.
Chhawmdawl hnathawktu te thingpui lumna turin Minister FCS&CA etc. leh Bialtu MLA ni bawk Pu John Rotluangliana'n Rs.5000/- theuh VC panga ah pe in, District Bawrhsap Pi Lalbiaksangi pawhin Rs.1000/- theuh a pe bawk.
