Best Horticulture Enrepreneur-ah Koinonia

Aizawl, 24 May: Vawiin khan Horticulture Department buatsaihin HORTI FAIR 2016 hawnna hun Aijal Club-ah neih a ni a, he hunah hian  Koinonia Juice Plant chu Best Horticulture Enrepreneur-ah thlan a ni. He lawmman hi Parliamentary Secretary Pu Lalrinthanga’n Koinonia neitu Pu Vanlalchhanhima Ralte S/O Dr R Lalthangliana, Ex Minister kutah a hlan a ni.

Best Horticulture Enrepreneur dawngtu Koinonia Juice Plant hi Lengte Road-ah kum 2011 khan bul țan a ni a, an ram 3.8 Ha-a zauah Assam Lemon (Nimbu) kung 10,000 vel an phun țan a. Tunah hian Nimbu kung 8000 vel țha takin a rah mek a ni.

Koinonia Juice Plant hian Lemon Juice a thlum chi leh a al chi an siam chhuak mek a, he plant Intertek India Pvt. Ltd. hnuaiah Organic Certificate a neih thlap nghe nghe. Nimbu tui fir 20,000 lits vel Koinonia farm hian kum tin a thar chhuak a, hei bakah hian Nimbu huan nei mi 400 chuang hnen atangin Nimbu tui fir 40,000 lits vel kum tin an leisak bawk thin a. Kuthnathawktute tan malsawmna nasa tak thlentu an ni mek a ni.

Koinonia thei tui hi dawr tin deuh thaw-ah bur khat Rs 10 man chauha tlawm thlengin lei tur a awm tawh a, hralh a kal hle a ni.