Hmarchhak hmasawnna tur sawi ho
28 May: Ni hnih awh 65th plenary session of Northeastern Council (NEC), Shillong-a neih chu Zirtawpni khan zawh fel a ni a, hmarchhak hmasawnna chungchang sawiho niin, Mizoram larsap pawhin hmarchhak state-te hmasawnna tura rawtnate a sawi.
He huna tel, India prime minister Narendra Modi chuan budget kal laiah hian hmarchhak tana hman tur cheng vaibelchhe 30,000 a awm thu a sawi a, inkalpawhna la, rel, kawngpui leh tuikawng leh phone hmanga inbiakpawhna lama he sum hi hman tam a nih tur thu a sawi.
Hmarchhak state pariata larsap-te leh chief minister-te telnaah hian hmarchhak hruaitute'n NEC budget tihpun an rawt a, NEC chairman, DoNER minister Jitendra Singh pawhin hei hi awm a tih thu sawiin, tuna kum khata cheng vaibelchhe 700 dah thin chu beitham a tih thu a sawi.
Mizoram larsap Lt Gen (Retd) Nirbhay Sharma pawhin hmarchhak hmasawnna tur chungchang a sawi a, hmarchhak state-te chu Act East Policy hlawhtlinna tura hmun pawimawh an nih avangin sorkar laipui leh NEC tan ngaih pawimawh a tul thu a sawi.
Hmarchhak state-te'n harsatna inang tam tak an nei a, chu chu ngaih pawimawh a tul rualin state tinte harsatna ngaihthah palh a hlauhawm thu a sawi bawk.
Hmarchhak state-te hmasawnna atan thil pali a rawt a - inkalpawhna leh inbiakpawhna tha, ramri dep khuate hmasawnna tihchak, skill development ngaih pawimawh, lirnghing vanga khuarel chhiatna laka inven dan ngaihtuah te a ni.
NEC Meeting kum tina neih bakah kum laihawlah emaw thla li danah emaw neih thin a rawt.
Shillong atang hian remote control hmangin prime minister Modi-a'n Bairabi leh Silchar inkara rel tlan tur a vailiam a ni.
~ Aizawl Post
