Rangkachak suamna a tel te test parade neih tir

28 May: Rangkachak tawlhruk phurtu lirthei suamtua rinhlelh vanga jail-a tang sipai-te chu Test Identification Parade neihtir an ni a, civil witness-te'n pawn lam atanga bihin, puh an nihna hi a dik em tih hriat a nih theih nan an enfiah.

He thilah hian police te'n 39th Assam Rifles commandant leh sipai pakua an man tawh a, an man hmasak sipai pariatte chu District Jail, Aizawlah dah rih an ni. Tun hnaia an man thar (sipai) kha chu lock up-ah a la awm.

Magistrate kaihhruaiin Test Identification Parade (TIP) hi neih a ni a, tih danphung pangngaiin jail pindan chhunga awm sipaite chu pawn lam atangin 'civil witness' te'n enin, rangkachak suamnaa tel an nih leh nih loh te an enfiah a ni.

Civil witness te'n eng nge an sawi hriat a ni lo a, sipaite hi puh an nihna nemnghet zawngin nge a nemnghet lo zawngin an sawi tih hriat a ni lo.

An man hnuhnun Raja Pati hi 'chhuti'-a a haw lai a nih vanga mi dang ruala man loh, zawm tura Aizawla a kir hnu Chawlhnia police te'n an lo man kha a ni.

Zirtawpni khan court chuan darkar 48 kawl police-te hi an phalsak.

Thu dawn danin, ani hi rangkachak khawihtu bera a thiante'n an sawi a ni a, amah kawmtu police-te hnena a inpuan dan erawh hriat a ni lo.