Indonesia in pawngsual tute hremna na zawk siam
President chuan naupang khawihtute hremna na zawk pekna dan hi Nilaini khan a hming ziahhnain a pawm tawh.
Mawi lo taka naupang khawihtute hi jail aṭanga an chhuah hnuah pawh an chetdan enthlakna turin monitoring device vuahtir an ni bawk ang.
April thla khan Sumatra thliarkarh hmeichhe tleirawl kum 14 mi chu pawngsual rawn a nih hnuah a ruang hi hmuh a ni.
He thil thleng hian mipuit ea ti thinur hle a, pawngsualtute hremna na zawk pe turin sorkar pawh na takin an nawr zui a ni.
Indonesia sorkarin pawngsualtute hremna thar a siam hi mipuiten an thlawp ṭha hle. Islamic party, National Awakening Party member Abdul Malik Haramain chuan pawi khawihtute mipa thei loa siam an nih chuan a hnu zela an pawikhawihna tur a veng dawn a ni tiin, hei hi dan ang taka kalpui a nih dawn avangin mihring dikna chanvo palzutna a ni dawn lo tih a sawi bawk.
Hetihlai hian human rights activist ṭhenkhat chuan dan siam thar hi an sawisel a, hei hian pawikhawihna thleng a titlem phah an rin loh thu an sawi.
Sorkar chu dan thar a siam chungchangah thil hrechiang tawk loa an ngaih thu leh a, a dan siam chu phuba lakna ang mai nia an ngaih thu an sawi.
Mipui tam takin dan thar seltute an chhang let nghal a, mihring dikna chanvo palzutna nia sawitute chuan pawngsual leh tualthah chu mihring dikna palzutnaah an ngai ve lo em ni? tiin an zawt let.
