MSUI in zirlai titha chawimawi

Vawiin May 16, 2016 chhun dar 12:00 khan National Student's Union of India (NSUI) chuan Lal Thanhawla Auditorium Aizawl-ah kumina HSLC Top Ten leh HSSLC Top 3 mi sawmpakua (19) hnènah lawmpuina ciatation leh laptop an hlàn. He programme hi Mizoram Chief Minister Lal Thanhawla, Khuallian leh School Education Minister H Rohluna, Khual zahawm ten an hmanpui.

He hunah hian NSUI President Lalhmachhuana chuan an pogramme hlawhtlin nana sûlsutu NSUI-a a thawhpui te, Party-a a thawhpuite leh kan Minister-te chunga a lawmthu a sawi a, zirlai tithate chu, "Nangni aia tha hi Zoramin kan nei lova, kan chhuang tak zet zet che u a, chawimawi in phû takzet a ni. India ram state danga zirlaite nen in inel chho zel dawn a, in hma lam hunah theihtawp chhuaha bei zel turin duhsakna ka hlàn che u," a ti.

NSUI President chuan, "MZP-ah te inhmangin President te pawh ka lo ni ve tawh. Mahse Mizoram bàk tih vak ngaihna a awm thin lova. NSUI chu India ram pum huap a ni a, India ram khawi hmunah pawh zirna chungchanga harsatna in neih chuan in tan kan ding zel ang," tiin, "Zirlai titha chawimawina dawng tawh engemaw zat kan nei a, an chanchin chhui zui tlâk loh an awm nual mai. Vawiina kan chawimawite hi chu in chanchin chhui zui tlâk leh chhuanawm tak ni zel turin NSUI chuan a beisei tlat che u a ni," a ti.

School Education Minister H Rohluna, Khual zahawm pawhin zirlai titha chawimawina dawngte chu duhsakna a hlan rualin, tun tuma hlawhtling ve ta rih lote pawh August thlaa special exam-ah hlawhtling turin duhsakna a hlan a.

School Education Minister chuan topper te a ngaihsan rualin thahnemngaih thilah state dangte an la phàk loh thu sawiin, "Mark percentage hi sâng tak 90 above ni thei zak zak tawh se a lawmawm zual ang," tiin, zirna ngai pawimawh tak Chief Minister kan nei chu vanneihthlak a tih thu sawiin, "Education system mai bakah infrastructure lamah pawh nasa takin hma kan sàwn zel a, zirtirtu indaih loh avangin tun hnaiah pawh zirtirtu engemaw zat kan lak belh zel a. Primary school bikah pawh model sawm (10) kan din chho tawh a ni," a ti.

Mizoram Chief Minister leh Khuallian ni bawk Lal Thanhawla chuan zirlai tithate chawimawina chang an hria chu NSUI chungah lawmthu sawiin, zirlai titha chawimawi tlàk an la awm chu lawmthu a sawi bawk.

Chief Minister chuan, "MBBS pass pha lo tam tak kan awm a, mahse mithiam sang zawkte zingah chuan MBBS an pass hnu hian 'enge ka zir leh ang aw' an la ti chauh zawk a ni," tiin, "Kan Pathianthu chuan 'Inngaihtlawmna leh Lalpa tih man chu sum te, chawimawina te, nunna te a ni' (Thufingte 22:4) a ti a, chumi nei tur chuan a phût lèt 'inngaihtlawmna leh Lalpa tih' hi kan zir zelna tur kawngah hian a pawimawh hle a ni," a ti a, "Tin, 'Naupangte u, Lalpaah chuan in nu leh in pate thu zawm rawh u' (Ephesi 6:1) a ti a, chu chu kan tana tha leh kan dam reina tur a ni tih kan hriat reng a pawimawh," a ti bawk.

Chief Minister chuan Burma unau ten hlawhtlinna nei tura an beih nasatzia thu sawiin, "Sorkara innghah ai chuan mahni kea din ngei an duh zawk a, chutiang chuan harsa takin an bei hram hram a ni. Keini chu kan vannei a, kan hotuten thalaite khawvel thar ngaihtuahin zirna mai bakah kawng hrang hrangin hmâ a la mêk zel a, chumi tihlawhtlingtu ni tur chuan kan thalaite pawh in tan sauh sauh a ngai a ni" a ti.

Chief Minister chuan vawiina hlawhtlinna changtute chu an nu leh pate avanga hlawhtlinna chang an ni tih hre reng turin a chah a, "Thalaite hlawhtlinna hi hnam tan malsawmna a ni a, hlawhling zel tur chuan inngaihtlawmna leh Amah tihna kan neih a ngai," tiin, "Nakin lawka kan Kohhran, kan sorkar leh khawtlang hruaitu turte in ni tih inhre rengin in nun uluk ula, nu leh pa chawimawia Lalpa tihna nun vawng nung reng turin" a chah a, "In kal leh zelna turah duhsakna ka hlàn a che u," a ti bawk.

He hunah hian zirlai tithate hnen atangin thusawi tawi ngaihthlàk a nih bàkah zaithiam tak tak zai ngaihthlak a ni bawk.