Kum 2010-2014 inkar vela KVS sakna tura sum chingpen awm nia lang chungchangah MAMCO hotute'n Mizoram sawrkar hnuaia Anti Corruption Bureau (ACB) ah kum 2015 December thla khan complaint an thehlut a. Hetih hunlaia MAMCO deputy manager (marketing), managing director charge latu ni bawk Lalremthanga chu contractor leh midang dang hnenah KVS sakna tur kaihhnawiha sum la a, tichingpena puh a ni.
ACB-a complaint thehluha a lan danin, Mizoram hmun hniha KVS project-ah MAMCO leh KCS inrem danah hnathawhna atana sum dah atangin zaa 7 chu MAMCO hian agency charge atan a chang ang tih a ni. Hetih hunlaia managing director charge latu Lalremthanga hian a thuneihna hmangsualin contract hna awm tur changchawiin, contractor leh supplier mi pasarih hnen atangin cheng nuai 268 vel laa puh a ni a, heng sum te hi MAMCO account-ah lut loin Lalremthanga thurualpui nia hriat Mustaqur Rahman account-ah vek a lut a ni, tih a ni.
Sum laksak te hian contract hna an hmuh tak loh avangin an sum pek tawh leh a interest chu MAMCO ah an thinglet a, hetah hian sum tihchingpen leh thuneihna hmansual hi hriatchhuah a ni ta niin thudawnna chuan a sawi.ACB hriat theih chinah Lalremthanga'n sum a lo laksak te hi contractor leh supplier pasarih an ni a. Cheng nuai 25 te, nuai 66, nuai 45, nuai 8 leh nuai 35 te niin, heng KVS sakna atana MAMCO hnena sum puktir tum a awm bawk a, hmun hniha KVS din nan hian cheng nuai50 leh 68 te a puktir niin a insawi.
ACB hian mawhphurtua puh Lalremthanga bakah, contractor leh supplier hming lang te, MAMCO hnathawk te an kawm kual tawh bakah, finfiahna atana pawimawh hrang hrang te an lakkhawm hnu in Lalremthanga hi kar kalta khan an man a. Court hnenah thu zawhfiah tura kawl dilin a ni hian court-ah anticipatory bail a dil ve bawk. Amah hi sawrkar hna la thawk lai mek niin a bail dilna hi May 26, 2016 hian Special Judge, Prevention of Corruption Act court-ah ngaihtuah a ni ang.
Thu lakna ;: Aizawl post
