11th May : Myanmar Parliament-in Aung San Suu Kyi-i enkawl tur Ministry thar siam a remti. Myanmar President, U Htin Kyaw chuan thuneihna a chan hnuah sawrkar hmasaa Ministry 36 awm thin chu 21 ah titlemin, heng ministry-te hi minister 18-in an enkawl a, ram danpuiin President thlanna chuh ve thei lo tura a tih, Suu Kyi chu Foreign Affairs leh President Office enkawltir a nih hnuah, thuneihna sang zawk nei turin State Counsellor atan ruat ni mah se, sawrkar inrelbawlnaah dinhmun sang zawk chantir a nih theih nan President Htin Kyaw chuan Suu Kyi-i enkawl tur Ministry hran siam leh a rawt a, he rawtna hi Parliament-ah put luh a nih hnuah nimin khan pawm a ni ta a ni.
Office of State Counsellor Ministry nen hian sawrkar tharah Ministry 22 a awm tawh dawn a, kum 2008-a ram danpui siam thatah Ministry pawimawh 3 – Home Affairs, Border Affairs leh Defence-te chu sipai thuneihna hnuaia awm reng tura tih ni mah se, tun tuma ministry siam thar hian sipaite enkawlnaah pawh thuneihna sang tak a nei tawh dawn nia hriat a ni a, ram inrelbawlnaah eng ang taka pawimawh tur nge tih erawh chu hriat a la ni lo.
