Lawngtlai LADC office thawktute hnen atanga thudawn danin, office rawk hun hi chiang taka hriat theih nilo mah se, May 7, inrinni zan dar 10:30 vel a nih rin a ni. Pathianni chhuna LADC office chowkidar tuikhai turin office rawk a ni tih hi a hmu a, Lawngtlai Police te hriattir nghalin, Police lam hian office hi an endik nghal a, Pathianni zan dar 8 vel khan Lawngtlai Addl. SP ruahmannain SDPO leh Police thenkhat ten office hi an endik nawn leh a, LADC office-a chowkidar 2 te chu thu zawhfiah atan Police te hian an la ta a ni.
Office suasam a nih dan atangin LADC office rawktu hi mi pakhat aia tam an nih rin a ni a, misual te hian LADC Executive member 1 room bakah, Officer dang 4 te room chu an suasam nasa hle a, steel almirah engemawzat an karchhiat bakah, Account officer Rosalyn Lalrinpuii room-a pawisa dahna safe lian erawh an kar chhe thei lo. Safe hi tih chhiat tumin misual te hian an bei nasa hle tih an hnuhma atangin hmuh thei a nih thu Lawngtlai atanga thudawnna chuan a sawi.
Thudawn danin LADC office rawktute hian pawisa an zawng nasa hle tih an hnuhma atangin a rin theih a, room hrang hrang 4 a steel almirah leh drawer te kar chhiin nasa takin an hai tih a hriat theih bawk. Vanneihthlak takin rukru te luhna room 4 ah hian pawisa dah a awm loh hlauh a, misual te hian thil lian tham lak an neilo a, office dawhkan a file leh lehkha pawimawh dang dah te erawh an thehdarh nasa hle thung a ni.
