Mizoram Hindi hotu atan RB Lalmalsawma
Aizawl, 6 June : Mizo țhalai zinga ram leh hnam tana huaisen taka ke pen ngam, WORLD BANK ROAD siamtlang a nih theih nana Chhimphei MZP (CMZP), President a nih laia huaisen taka hma latu Pu RB LALMALSAWMA chu tun hnai khan MIZORAM HINDI PRACHAR SABHA (Board of Hindi Propagation) CHAIRMAN (Sabhapati) atan thlan tlin a ni. Mizoram Board of School Education (MBSE) ang bawka Hindi lama board hlun Mizoram Hindi Prachar Sabha (MHPS), “Sabha” tia Mizo mipui hriat, Prof. Darchhawna te paw’n kum 20 lai an lo kaihhruai tawh țhinah hian Pu RB Lalmalsawma hi Chairman hna chelh tawha la naupang ber niin MIZO HINDI ZIRLAI PAWL (MHZP), President lo ni tawh leh MIZO STUDENTS’ UNION (MSU), Gen.Hqrs. Vice President leh Chhimphei Tangrual Pawl President pawh ni tawh mi tawnhriat ngah tak a ni a; mahni zirlaipuite hmakhua ngaih avang leh ram leh hnam tana thil țha duh avanga Jail vawi 4 lai lo tang tawh a ni nghe nghe.
Ralte Bungsut (RB) Pu Lalmalsawma (Phulpui khawchhuak) hi thiamna lamah MA (HINDI) niin MHPS-a term 3 Secretary hna lo chelh tawh leh HINDI LALPA (Hindi Samrat) tia hriat lar Dr. VR RALTE din PARADISE HINDI SCHOOL-ah kum 2001-2005 chhunga Teacher cum Secretary hna lo chelh tawh a ni a. Dr. VR Ralte chuan, “RB Lalmalsawma hi mi tumruh tak, Mizo tlawmngaihna nunpui tlat leh ram leh hnam hmasawnna tur ngaihtuah reng mi a ni a, Central lamah pawh tawnhriat ngah, tuna MHPS BUILDING thar tur sak mek atan pawh a țul ang ang tâwn tlang ngam MHPS-in Chairman atana kan nei ta hi a thlamuanthlakin Hindi zirna kawngah Zofate tan hmasawnna ropui tak a ni. MINISTER atan pawha iaiawm loh, ani hmang hian MHPS tan ‘NEW ERA’ a ințan a ni." a ti.
Mizoram Governor Pu AR Kohli hunlai khan Mizoram sawrkarin Hindi Teacher dik leh fair taka lakna tura Mizo Hindi Zirlai Pawl (MHZP)-in Pu RB Lalmalsawma kaihhruainaa hma a lo lakna te leh Hindi zirlaite’n Post Matric Scholarship an lak ve theihna tura a sulsutna te avangin Pu RB Lalmalsawma hi Pu Kohli-a khan ram leh hnam tana țhalai huaisen, hna thawk țha tia a lo comment tawh kha a ni a; nikum (2015) khan All India Federation of Hindi Organisation, New Delhi-in Hindi tana a lo thawhhlawkna thlirin “GOLDEN JUBILEE AWARD (2015)” hlanin a lo chawimawi tawh bawk a ni.
Tuna Pu RB Lalmalsawma Chairman nihna Mizoram Hindi Prachar Sabha (MHPS) hi Govt. of India, Ministry of Human Resource Development, Department of Higher Education-in a pawm (recognised) niin, Hindi BA (Praveen) thleng Deegree pe theitu a ni
