Serchhip District Biometric enrollment neih tan a ni

15th Jan, Serchhip : National Population Register hnuaia Unique Identity Card siamna tur atana pawimawh pakhat Biometric Enrolment chu Serchhip District chhunga cheng te tan, District Bawrhsap Pi Juhi Mukherjee, IAS hriatpuina in vawiin chawhma dar 9:00 atang khan New Serchhip Bazar chungah neih tan a ni a, he hna hi Lyra Consultancy Services, Kolkata ten an thawk a ni.

Biometric Enrolment hian India ram chhiarpui (Census) 2011 a mihring chhinchhiah tawh, kum 5 chunglam te a huam a, kutzungtang sawm (ding lam leh vei lam) thla (Fingerprints), mit naute (iris) pahnih thla leh sakhmel (facial image) thlalak pakhat theuh lak a chhinchhiah tur a ni a, heng thlalak hrang hrang te hi Unique Identification Authority of India (UIDAI) hnenah thawn ani ang a, UIDAI in mitin tan number bik a lo siam sak ang a, chu chu Registrar General of India hnenah thawnin an Identity Card tur an lo siam ang a, heng ID Card te hi a neitu tur dik tak hnenah Dak In kaltlangin thawn an ni ang.

Serchhip District chhunga Biometric Enrolment nei tur hian District chhung hi Urban leh Rural a then a ni a, Urban hian Serchhip town area a huam a, tunah hian Urban Enumeration Block 12 zinga Enumeration Block I leh II ah Biometric Enrolment hi neih mek a ni a, ni 45 chhungin Urban Biometric Enrolment hi zawh fel hman tum niin Serchhip Rural Biometric Enrolment hi a hranpa in an rawn ti leh dawn a ni.

Biometric Enrolment hi misual man chhuahna kawngah te, Sawrkarin hmasawnna hna mipuite hnena a thlenna kawngah te leh thil dang tam takah a tangkai em em a, India ram bakah USA, UK, Australia, Brazil, Canada, Germany, Israel, Italy, Netherlands, New Zealand , Norway, Ukraine, Iraq leh Gambia te pawhin he programme hi mumal takin an kalpui mek a ni.

Vawiina Biometric Enrolment neih hi Serchhip District Additional DC, Pu Lalsangliana, MCS leh Charge Officer Pu Lalthanzira, DPC, SSA ten a hmunah an enpui a ni.