Aizawl, 21 March: Kumin kum bul atanga March ni 10 thleng khan Mizoramah vawi 81 zet ram a kang tawh.
Environment and Forests department hotute hnen atanga thudawn danin ram kang hi lo hal hun tawp March ni 15 hnulam kha chuan a awm vak tawh lova. Nikum March leh May thla inkar chhung khan vawi 1,563 a kang thung a, Hectare 2647 chuang a zau a kang chhia a ni.
Hetihlai hian Geographical Information System (GIS) Satellite atanga leilung thlalak atanga a lan danin lo hal hun chhung March ni 15 leh a hmalam khan hmun tam takah kangmei a chhuak a, heng kangmei chhuak te hi lo hal nge ram kang tih finfiah tum mek a ni a. Kangmei chhuak zat leh engtia zau nge kang tih tichiang turin hmalak mek a nih thu Environment and Forest hotute chuan an sawi a ni.
