Aizawl, 21 March: Uttarakhand Assembly-a an party laka hel, Cong. MLA 9-te chu insawifiah turin Assembly Speaker-in a hriattir a, heng MLA-te hi Harish Rawat-a sorkar ban tura BJP MLA-ten Governor an hmuhnaah an tel ve a ni.
Hriattirna a pekah Speaker Govind Singh Kunjwal-a chuan anti-defection law hnuaiah Vidhan Sabha member an nihna hlihsak an nih lohna chhan tur sawifiah turin a hrilh a, chhanna thehluh nan tun thla ni 26 thleng hun a pe a ni.
Puan tawh angin, state Governor KK Paul-a chuan Chief Minister Harish Rawat-a chu member a ngah tawk leh tawk loh, tun thla ni 28 hmaa House-a fiah turin nimin khan a hriattir a, hemi hma, Zirtawp zan khan BJP MLA 27-in Governor hi hmu-in sorkar an din theih thu an hrilh a, Governor hmuhnaah hian Cong. MLA 9 an tel a, heng zingah Chief Minister hlui, Vijay Bahuguna leh Inrinni kaltaa cabinet minister atanga ban, Hark Singh Rawat- a te pawh an tel a ni.
