Kan hriat theuh angin nikum July thla tawp lamah khan Myanmar-a Zofate chenna Chin Hills State chuan leimin nasa tak tuarin, phailama Zofate pawhin tuilian nasa tak an tuar a nih kha. Khami tuma Chin Hills a leimin tuar rau rau ah pawh Hakha khua chu a tuar nasa ber niin, In 5000 vel zingah In 500 aia tam luah tlak loh awmin, In enge maw zat a chhe bawk a. Heng kan unaute chhawmdawl nan hian YMA leh NGO dangte bakah Mizoram sorkar pawhin nasa takin tha a lo thawh tawh a nih kha.
Leimin tuar nasa em em, mihring 30,000 chuang zet khawsakna Chin State khawpui Hakha hian tui supply a nei tha lo hle a. Tui supply tha a awm theih nana theihtawp an chhuah hnuah, vanneihthlak takin Myanmar sorkar chuan Pumping Scheme hmanga Hakha mipuite tana tui lakna tur sanction chu tichhuak in, hnathawh tan theih a ni ta a.
Amaherawhchu, Myanmar rama Engineer te hi kawlphai ami an nih deuh vek avangin tlangram a tui pump chhuah danah tawnhriat an neih tawk loh avangin Hakha Rescue Committee chuan an scheme hmuh chu a hlawhtling tawk lo ang tih an hlau hle a. Mizoram sorkar chu kawng engkima puibawm a, Mizo Engineer rualte tira ruahmanna siampui turin Hakha Rescue Committee chuan Mizoram sorkar hnenah 7th April, 2016 khan ngenna a rawn siam a ni.
Hetianga khawchhak lama kan unau, nikum maia leimin nasa tak tuartuten tui supply tha an hmuh theih nana a tul ang ang buaipui tura Mizoram sorkar an ngenna chu thuneituten ngai pawimawhin, PHE Minister Pu Zodintluanga chuan Chief Minister Pu Lal Thanhawla remtihpuina in PHE department hnuaia tlangram a tui pump chhuah a nih theih nana tawnhriat nei tha tak tak Engineer pali:
1. Er. Lalropuia, EE (civil)
2. Er. K. Zohmingliana, EE (civil)
3. Er. Thanchungnunga, EE (mechanical)
4. Er. C. Zothantluanga, SDO (electrical) te chu a tir chho ta a. Heng Engineer rualte hian tlangrama tui pump chhuah dan tube Well te, Drainage System te leh Rain Water Harvesting Scheme atan te ruahmanna siampui nghal in, kan unaute tana hna tul ang zawng zawng an thawh zawh hnuah tluang takin Mizoram an lo let leh tawh a ni.
Khawchhak lama kan unaute tanpui dilna hawihhawm taka lo dawngsawng a, tanpui an dil ang taka tanpuina lo pe thuaitu Chief Minister Pu Lal Thanhawla leh PHE Minister Pu Zodintluanga te an fakawm tak zet a. Kan unaute harsatna sukiang tura Mizo tlangval Engineer rual an han tir lut thei hi a lawmawm in a ropui tak zet zet a. Insuihkhawmna hi in duhsak tawnna leh in tanpui tawnna nen lo chuan a hlawhtling thei dawn si lo a. Zoram khawvel chhung a Myanmar sorkar awp chin chhunga awm, Hakha mipuite harsatna sukiang tura Pu Lal Thanhawla leh Pu Zodintluanga te hmalak dan hi a fakawm tak zet a ni.
