Aizawl: DM&R Dept. changtu minister C. Ngunlianchunga'n thli tleh leh rial tla vanga chhiatna tawk chhungkuate chu theih ang anga chhawmdawlna pek an ni dawn tih a sawi.
Thuthar lakhawmtu ţhenkhatin an kawmna ah C. Ngunlianchunga chuan tun hnaia thli tleh leh rial tla vanga chhiatna thleng chu a nasat avangin tuna pawisa neihsa aţang chuan ţanpuina hi pek vek theih a ni dawn lova, chhiatna kan tawh dan hi sorkar laipui hnuaia National Disaster Management Authority-ah thlen a ni anga, ţanpuina pawisa tam zawk pe chhuak tura dil a ni dawn tih a sawi a.
Khuarel chhiatnain in leh lo a tihchhiat zingah luah zui tlak loh khawpa chhiate chu dan awmsa angin ₹ 1,01,900/- bakah rangva bundle 4 pek an ni dawn a,_ a dangte pawh pawh a chhiat nasat dan a zirin ţanpuina hi pek vek an nih tur thu a sawi. Khuarel chhiatna vanga in leh lo chhia reng reng chu a bialtu SDO (Civil) ten a hmunah an endik vek zel tih sawiin, heng vanduaina tawkte hi bialtu MLA kaltlangin an tawm hulna tur Silpouline pek zel an ni, a ti
(Zalen, Pathianni April 24, 2016)
