“SHDC chhunga helte hian inbiak an duh tak tak a nih chuan biak tlaka an awm a ngai. Chhiahkhawnte leh dan lova khawsaknate an bansan tur a ni. Candidate te an nei ve dawn a nih pawhin democracy dan angin an campaign ve mai tur a ni,” Pu Hawla chuan a ti. Mizoram Land Acquisition, Rehabilitation & Resettlement Bill 2016 chungchang sawiin Chief inister chuan he Bill lo chhuah dan hi thil zahthlak tak a ni tiin kuttling lova sum lakluh kan duh lutuk avangin he Bill hi buatsaih loh theih loh a ni ta a ni, a ti. Kuttling lova sum lakluh hi Kohhran a inhmang tak takte pawhin an hreh lo hi a zahthlak a, chuvangin hetianga kawnga sum lakluh kan tumna thin hi tihreh nan he Bill hi hman tur a ni, Pu Hawla chuan a ti.
Zohnahthlak insuihkhawm chungchang sawiin Chief Minister chuan insuihkhawm hi thil tha tak a nih laiin politics zawnga lo lak chi a ni lo tiin, “Insuihkhawmna hi thinlung lam a ni zawk tur a ni. Pathian remruat a nih phawt chuan thisen far khat pawh far lovin Zohnahthlakte hi rorelna pakhat hnuaiah kan la awm ang tih hi ka ring nghet tlat a ni, a ti.
MNF leh India sorkar inkara inremna ziah chungchanga political party pakhatin khatihlaia sorkarna changtu Congress in engmah an sawi loh vanga inremna thuthlung pawh duhthu a sam lo ni anga an sawi chu Pu Hawla chuan Congress tan lo tawng ve a rem lova. Keini chuan an tih ang ang kan pawm ang, kan ti a. A tul chuan kan inte pawh kan thiat ang a, kan thuthleng pawh kan kian ang, kan ti mai a ni, a ti. Ramri chungchang inremna ziah hma hian kan sawi hova, mahse inremna thuthlunga telh a awm ta chuang lo a ni, a ti.
Pu R. Romawia, Land Revenue & Settlement Minister pawhin thusawiin 22.4.2016-a Mizoram Legislative Assembly Special Session in an pass tak, Mizoram Land Acquisition, Rehabilitation & Rehabilitation Bill 2016 chungchang a sawifiah bawk.
Rajya Sabha MP Pu Ronald Sapa Tlau pawhin thu sawiin Mizoram tan a tha tur thil hrang hrang a bawhzui thute sawiin chung zingah chuan apple thei Mizoram ang leka sanga hlawhtling taka an chin ang chi Mizoramah a that ve duh leh duh a enchhin tir mek thute a sawi.
He Political Session hi NPCC Gen.Secy Pu H. Lalzamova'n a kaihruai a, Headquarters Mahila Congress in Pu Hawla chawimawi nan hla mawi taki
