Aizawl, 23 April ( Save Mizoram) : Vawiin khan Mizoram a Sava chi hrang hrang thlalak tarchhuah runpui hmasaber neih Millenium Centre Ground Floor-a ASEP in a buatsaih chu, Mizoram Governor Lt Gen Nirbhay Sharma (Retd) chuan a tlawh.
.
Mizoram thalaite leh mi thahnemngai ten khawvel pawhin a ngaihpawimawh em em, ramngaw leh nungcha humhalhna kawngah zirtirna changkang tak leh mit la tak an chhawpchhuak thei chu a ngaihlu in a chhuang hle tih Birds Photo Exhibition chhimtu, Governor Lt Gen Nirbhay Sharma (Retd) chuan he hun buatsaihtu te chu a hrilh a.
.
Mizoram Governor a nih chhunga a ngaihpawimawh ber zinga mi, tihhlawntlin a lo ni ta chu nuam a tih thu sawiin - "Mizoram mipui te pawh ramngaw leh nungcha humhalh kawngah kan harh thar zel ka beisei", a ti. Ramngaw leh nungcha humhalhna kawngah ASEP leh tlawmngaipawl te hmalakna te chu Mizoram kiltin a cheng ten thlawp vek se a duh ti in Governor chuan ngenna a siam a ni.
.
ASEP leh a thawhpui te buatsaih Sava thlalak pholanna hian volunteer 45 in thlalak phekhlai chi 160 zet frame ah dah lut in an pho chhuak a. Heng thlalak ah hian Mizoram chhunga sava chi hrang 90 thlalak a chuang a ni. Mipui ngenna avang in he exhibition hi thawhtanni thleng pawh sei a ni.
