Mizo Student Union (MSU) Headquarters, Aizawl hruaitu mi 5-te chuan President PC Lalrinhlua hovin vawiin, Dt. 22nd April, 2016 chawhnu dar 2 khan Myanmar-a Chin State Chief Minister Pu Salai Lian Luai leh Chin State Parliament Chairman Pu Zo Bawi te chu Hakha khuaah hmuin an kawm a, Chairman a nih lawmpuina thuziak an hlan nghal.
MSU hruaitute hian Chin State Parliament Chairman Pu Zo Bawi hmu hmasain, lawmpuina thuziak a hlan a, hemi hnu hian inkawmhona neih nghal a ni. Pu Zo Bawi chuan, “Democracy hmelhriat tan tir kan ni a, zirna lamah pawh nasa takin hma kan la chho dawn a; Mizote hi lehkha in thiam a, kan zirna sangah te hian Mizoram lam atangin thawktute pawh lo lut sung sung ula ka duh takzet,” tiin a sawi a, “Mizoram lam atangin pawl hrang hrangin min tanpuiin a, tunah te pawh lawmpuina min pe bawk a, kan lawm hle. Mizoram zaithiamte pawh an lo kal thin. He lam zaithiam ai chuan Mizoram zaithiamte hi an thiam zawk hle bawk,” tiin a sawi nghe nghe. MSU President PC Lalrinhlua pawhin, “MSU chuan Zofate zinga Chin state hruaitu tha tak tak kan nei thar hi kan chhuang che u a, Chin University Students Fellowship neihnaa kan lo kal remchanga hmangin lawmpuina kan hlan cheu a ni,” a ti a; "Chin state zirlaite leh Mizoram zirlaite inpawh kan duh avangin, harsa leh remchang lo chung chung pawhin kan lo kal hram hram thin,” a ti bawk.
Hemi hnu hian Chief Minister Pu Salai Lian Luai chu hmu lehin lawmpuina thuziak hlan nghal a ni a, Chief Minister chuan MSU hruaitute chu thingpui inpui nghalin, “MSU te’n min lawmpuina hi ka lawm hle. In hriat angin bul tan tir kan nih avangin kan fimkhur a ngai hle a, kan kal zelna turah pawh Mizoram mipuite tawngtaipui kan ngai takzet a ni,” a ti a, “Hetianga thalaite leh zirlaite’n intlawh tawnna hun remchang in nei thin hi ram tan a tha hle a ni,” a ti bawk. Chief Minister hnenah hian MSU President PC Lalrinhlua chuan, “Unau kan nih angina ram hrang anga inen lovin state pahnih zirlaite awlsam zawka kan intlawhpawh theihna atana hma min laksak turin ka ngen a che,” a ti a, kum 2014-a Hakha-a MSU leh CSU huaihawta Chhinlung Cultural Festival an hman thu sawiin, “Heng kan hmalaknate hi kan inunauna a ngheh lehzual theihna tur a ni. Chin state-a zirlaite pawhin university level atanga a hnuai ber thlenga lehkha in zir duh a nih chuan rawn pan ula, harsatna in tawhna apiangah theihtawpin MSU chuan kan lo pui zel ang,” a ti bawk.
Chin University Students Fellowship hi tukin khan neih tan a ni a, Vumtumaung Stadium, Hakha-ah opening ceremony neih niin MSU hruaitute hi a bik taka sawm an ni. Hemi hma zingkarah khan Carson Hall-ah zirlaite tan seminar neih a ni a, Pu Lian Hmung Sakhong, Chin National Front Vice President chu resource person a ni. He hun chhim tura sawm kan nih angina MSU chuan kan chhim bawk. Zanin tlai hian MSU President PC Lalrinhlua chuan Chin Media Network te nena inkawmhona an nei ang a, hemi hnu hian Carson Hall-ah Chin University Students Fellowship programme-ah MSU President hian thu a sawi ang. MSU hruaitute hian naktukah Tahan lam panin Tahan zirlaite nen inkawmhona an nei bawk ang.
