30th April, 2016 (MSR) : April ni 28 khan Central YMA Committee Room-ah CEC Meeting neih a ni a, ram leh hnam humhalh nana tul hrang hrangte an ngaihtuah.
CEC meeting hi President Pu Lalbiakzuala'n a kaihruai a, rorel zingah District Council hun lai atanga pek tawh Trade License tun thlenga la hmang, hnamdang sumdawngte hi tih tawp a nih theih nan a tul anga zirchian YMA chuan a tum a. Kumpuanah ram leh hnam humhalh kan neih mek lai a, hnamdang sumdawng ten dan lova Motor-a bungrua phur kuala zalen taka Mizorama an vak kual hi tha an ti lova, Central YMA, Sub-Hqrs. YMA, Group leh Branch YMA-ah hma lak a tum a. Mizoram chhunga hnamdang sumdawng ten Sorkar Department leh sipai behchhana Canteen an rawn siam chungchang hi zirchian a, a tul anga tihtawp a nih theih nan hma lak a tum bawk. Sorkar Department ten Central YMA remtihna la hmasa lova Branch YMA-te Direct-a an dawr thin hi tha a ti lova, tun hnuah chuan Central YMA pawmpuina la hmasa lo chuan Branch YMA-te Direct-a dawr tawh lo turin an ngen a ni.
CEC hian 22&23.4.2016-a Mizoram hmun hrang hranga thli leh rialin a tih chhiat in leh lo chante zirchianga, a tul anga tanpuina pek a tum a, YMA Day pualin Guwahati Mizo Welfare, Kolkata Mizo Welfare, Mumbai Mizo Welfare, Delhi Mizo Welfare, Chennai Mizo Welfare, Bangalore Mizo Welfare, Vellore Mizo Welfare, Hyderabad Mizo Welfare, Pune Mizo Welfare, Silchar Branch YMA te hnenah cheng singkhat theuh leh Tawngtai Bethel Camping Centre, Chawnpui tan cheng singnga (Rs. 50,000.00) a vaiin cheng nuai 1 leh sing nga chu pekchhuah nise an ti bawk.
