Mizoram Pro Volleyball tan dawn
5th May, 2016 (MSR) : Zothan Auto Works Pro Volleyball League chu zanin hian R Dengthuama Indoor Stadium, Mualpuiah tan a ni dawn ta a, zanin hian Hunthar VC leh TNT te an inkhel dawn a ni,.
Zothan Auto Works Pro Volleyball League-ah hian Club paruk Hunthar V/C, 3nd Bn MAP, Chanmari West S/C, Anastasia V/C, Hmingi V/C leh TNT te vawikhat theuh an in khelh kual hnuah point hmusang pahnih ten final an khel dawn a ni.
Zanina inkhel tur Volleyball Club te profile lo thlir ila:
Hunthar Volleyball Club hi 1991 atangin Hunthar Vengah volleyball an khel tan a, 2005 khan Volleyball Club dinin kum hnih kal ta atangin nung lehzualin an kalpui a, tun season-ah first division team tha ber an ni a, Zothan Autoworks Pro Volleyball League khel tur team paruk zingah rin kai an ni.
Aizawl khaw chhunga veng hrang hrang zinga volleyball-a insawrbing nasa tak Hunthar hian volleyball an khelh tirh atanga kum ruk chhung Fire Department tualzawlah khelmual tha pangngai nei mahse an hman zui a rem lo va, 1997 atangin kum riat chhung pathum leh pathum inkhelh theihna an veng middle school kawt chu rinrawlah an hmang a, hetih chhung hian inelna hrang hrangah trophy panga an la a ni.
Pu Lalmalsawma Sailo leh bialtu MLA Pu Lalthanzarate hmalakna atangin mumal taka inkhelh theihna tur khelmual tha pangngai tak an nei zui thei a, Volleyball Club an din hnu lawka tha taka inbuatsaihna tur hmunhma an nei. Mahse, club-in harsatna tawkin eng emaw chen kalpui zui a nih loh hnuah 2014-2015 seasoon-ah an din thar leh a, second division-ah bultan tha lehin an sang ber a, first division-ah inhlangkaiin tun season-ah tournament vawi thum khel tawhin vawi hnih an champion a, first division team paruk zingah hlawhtling ber an ni.
Hunthar hi club inelna sang Super League hmasa ber 2005-ah an champion a, club huang pawn veng leh khaw hrang hrang intihsiaknaah sulhnu an nei tha hle bawk. Inter Branch YMA Volleyball-ah final vawi nga lutin tum hnih an champion a, inter-village tournament hrang hrangah tum nga trophy la tawhin Republic Day lawmna tournament-ah tum li an champion tawh bawk.
Hunthar atangin Mizoram aiawh thei player tha tam tak an chhuak tawh a, tunah hian club dangah an player tha thenkhat awm mah se an veng player pakua leh hmun dang atanga an lak luhte nen Pro Volleyball khel turin player 16 an ziak lut.
Thutak Nunpuitu Team Volleyball Club :
2001 khan Thutak Nunpuitu Team chuan Volleyball Club dinin mumal taka kum 11 an kalpui chhungin Mizorama hlawhtling ber an ni a, Zothan Autoworks Pro Volleyball League khel tur team paruk zingah hming nei leh ngaihven hlawh tak an ni.
Pangngai taka club an din hma atangin TNT hian volleyball-ah hnuhma nei tawh mahse an mahni atangin NIS Coach zir chhuak Pu Lalmawizuala Sailo chuan mumal leh changtlung zawka club din a rawt angin an kalpui zui a, tun kum 15 chhungin inelna hrang hrangah trophy 34 an la tawh a ni.
Mizoram volleyball tinungtu pawimawh tak TNT hian infiamna zinga ngaih pawimawh berah volleyball an nei a, naupang an enkawl seilen zinga engemawzatin Mizoram aiawhin volleyball an khelh bakah tun thlengin team tha an din theihna kawnga pawimawi tak chu anmahni hnena awm naupang an chher lente an ni a, hmun danga player tha la tel bawkin eng lai pawhin team tlo leh nghet tak an nei reng a, Mizoram inelna sangah tlakfual nei lovin a tha ber pawl an ni thei reng bawk a ni.
Mizoram aiawhin national championship-ah TNT-in senior team bakah kum bithliah inelna a hmachhawn tawh thin a, Mizoram volleyball boruak chawikan nan 2013 atangin ram pum huap intihsiakna lian tham Volleyball Khawmpui Lian an buatsaih thin bawk a, vawi thum khawmpui neih tawhah a hnuhnung ber nikum khan an champion.
TNT team te hian Mizorama ngaihlut hlawh tak ni thin Independence Day tournament-ah vawi ruk champion tawhin team hlawhtling tak PHE record vawi nga an khum a, Republic Day tournament-ah tum nga champion tawhin PHE nen trophy an lak zat a intluk chiah a ni. First division inelna sang Super League-ah TNT-in vawi thum trophy la tawhin club hlawhtling ber an ni a, chutih laiin tun kum hnih chhungin an tlahniam deuh hret a, season liam taa an elpui 3rd MAP an hlawhtling zawk a, tun season-ah Huntharin an ni aiin trophy an la tam leh a, a sang pahnih zingah an tel zel a ni.
Mizoram Volleyball Association-in 2005 atangin first division team tan kum tin Super League a buatsaih thin a, kumin atangin Pro Volleyball tia thlak niin changtlung zawk leh inelna sang zawka buatsaih a ni dawn. Super League hnuhnung bera champion TNT-in Pro Volleyball League title hmasa ber lak tumin an hmunpui Muanna Vengah tum dang zawng aia ngawrh leh rim zawkin inpuahchahna an kalpui.
TNT hian squad lian tha tak player 17 awmna neiin Pro Volleyball an hmachhawn dawn a, heng zinga 10 hi an mahni hmunah awm an ni.
