5th May, 2016 (MSR) : Nimin khan Bhaidas Hall, Juhu, Vile Parle West, Mumbai-ah Shri JJT University chuan 3rd Special Convocation an hmang a, he hunah hian lehkha zirmi te tana Degree neih theih zinga a sang ber anga chhal, Doctor of Letters (D.Litt.) Degree (Honoris causa) chu Mizoram Governor Lt Gen Nirbhay Sharma (Retd) hnenah hlan a ni.
India ram leh a mipui te tana hna a lo thawh tawh te ngaih hlut sak a, D.Litt. Degree pek a ni chu thinlung taka lawmawm a tih thu Mizoram Governor Lt.Gen. Nirbhay Sharma (Retd.) chuan a sawi a. Sawrkar leh mipui te tan kum 50 zet hun a hman chhungin buaina te, remna te, hmasawnna te, indonna leh thil dang tam tak a hmuh tawh thu a sawi a. India tana hun chhinchhiah thlak tam tak a tawn tawh thu leh a mit ngeiin a lo hmuh thin thu a tarlang a. Tun hun erawh chu 'India Hun' a ni tawh tiin hun rei loteah India chuan a phu tawk dinhmun pawimawh tak khawvel ram dang te zingah a luah thuai dawn a, chu mi atan chuan India hi a insiam rem mup mup mek a ni a ti.
A sawi zel naah Mizoram Governor chuan, "India ram tana hun lawmawm rawn inher chhuak mekah hian Hmarchhak mite leh a bikin Mizoram thalai te hi an zuan luh a ngai a, an tan hun remchang buatsaih sak an phu a ni", a ti a. India thalai zingah mahni kutkea dinchhuah tum, thil thar hmuchhuak a, hmasawnna kawng buatsaihtu tam tak hmuh leh hriattur an awm chu vanneihthlak a tih thu a sawi a. Human Resources chu India chakna hnar a ni a ti. Mizo thalai zingah pawh mi chhuanawm leh entawntlak tam tak an awm mek tih tarlangin tun hnaiah ngei pawh Mizo pa thluak tha zet mai chu Rashtrapati Bhawan chuan Innovation Scholar atan a thlang tih a tarlang.
Hmun dang ang bawkin Mizoramah zirna chu hmasawnna hmanraw pawimawh a nih angin ngaih pawimawh a nih thu a sawi a. JJTU leh University dang te pawh Hmarchhak leh Mizoram te nen student exchange neih puiah a sawm a, Research leh skill development chungchangah thawhhona neih a tangkai tur thu a sawi a. Convocation chhimtu te chu, Act East Policy puitlin hun a hmun pawimawh tur, Mizoram lam hawia ngaihtuahna seng tur leh remchanna rawn zawng turin Mizoram Governor Lt Gen Nirbhay Sharma (Retd) chuan a sawm a ni.
Convocation programme hi Chancellor, Dr. Vinod Tibrewala, Vice Chancellor, Dr. Avinash Mehta leh Dr. V.S. Valecha, Director of Education te chuan kaihruaiin state hrang hrang Governor te Governor hlui te, kawng hrang hrahnga mi hmingtha leh chawimawina Padma lo dawng tawhten an chhim a ni.
