Aizawl, 6 May: Rangkachak tawlhrûk cheng vbc. 14.5 vel hû rûkbo thubuaiah police-te'n nimin khan 39 Assam Rifles commandant Col. Jasjit Singh an man. He thubuai kaihhnawihah hian police-te chuan Assam Rifles sipai pakua leh civil mi pali an man tawh.
Police hotute sawi danin, December 14, 2015 zana Zam-puimanga thlan bula motor aṭanga rangkachak rûkbo chungchanga AR mi leh sa an mante chuan, rangkachak chu an Commandant zin a haw veleh an pek nghal thu an sawi a; Col Jasjit Singh zin chu he mi tuk hian Aizawlah a haw nia thu dawn a ni.
He thil chhuitu Special Investigation Team (SIT) leader Stephen Lalrinawma, CID(Crime) additional SP chu May 4, Nilaini tlai khan tlai dar 3:30 velah 39 AR hmunah a kal a, thu an zawhfiah duh avangin Jasjit Singh chu tlai dar 5:30-a koh a nih thu a hrilh a, ani hian a kal ngei tur thuin a chhang.
Nilaini tlaiah vek hian Col. Jasjit Singh chuan inentir a ngaih avanga a kal theih lo tur thu leh hun dang ruatsak turin SIT-te a hrilh a; SIT chuan nimin chawhma dar 10-a kal turin an hriattir leh ta a ni.
Mahse, Col. Jasjit Singh hi SIT hnenah kal loin, District Court-ah bail dil turin a kal a, chu chu an hriat veleh police-te chuan magistrate hnenah man theihna, warrant of arrest an dil ta nghal a. AR Commandant hi man an tum a, mahse, Court-ah a awm tlat avangin an man thei lo.
Bail a dilna chu District & Session Court judge Lucy Lalrinthari chuan chhun dar 12 velah a ngaihtuah a, sorkar ukil leh Jasjit Singh-a ukilte thusawi a ngaihthlak hnuin, anticipatory bail a dilna chu a hnâwl.
Col. Jasjit Singh-a ukil chuan an client chu rangkachak rûkbonaah inhnamhnawihna a nei lo niin Court a hrilh a, "He thil thlen lai hian Silchar-ah a awm daih a. Police-in Jasjit Singh an kohna aṭanga a lan danin, AR mi leh sa an mante thu an zawhfiahna aṭanga a lan danin, an hotupa an puh vek ni awm tak a ni. Tunah hian AR mi leh sa an mante hian criminal complaint an file a, tihluihna hmangin an duh duh sawitirah police-te an puh lêt," a ti.
AR Commandant ukil chuan, force mite chu sorkar laipui aṭanga remtihna hmuh a nih loh chuan man ngawt theih an nih loh thu sawiin, police-te chuan sorkar laipui aṭanga phalna an hmuh loh thu Court a hrilh.
Sorkar ukil H Lalmuankima erawh chuan, force mi leh sa pawh ni se, official duty an nih loh chuan man theih an ni tih sawiin, "Assam Rifles-te hi offcial duty an ni lo. Chu bakah, AR DIG-in Col. Jasjit Singh hi a suspend tawh. Bail-a chhuah a nih chuan investigation a tihbuai theih bakah, rangkachak thuhrûk hmuh chhuah lehna kawngah pawh harsatna a awm thei," a ti.
SIT leader Stephen Lalrinawma pawhin Col. Jasjit Singh chu chhungkaw hausa leh thiltithei tak an nih avangin bail-a chhuah a nih chuan ram dangah a kal daih theih thu a sawi a; mipui venghimtu tura ngaihte thil dik loa a inhnamhnawih chu thil pawi tak a nih thu Court a hrilh.
Col. Jasjit Singh ukilte chuan, AR mi leh sate chu Commandant thua duty an nih thu sawiin, "Commandant thu lo chuan an duty ngawt thei lo. Zampuimanga thlân bula an awm ṭhin chhan pawh silai tawlhrûk thila an thu dawn an bawhzui ṭhin. Hemi chungchangah hian Jasjit Singh hi official duty ngei a ni a, dan angin sorkar laipui remtihna tel lo chuan a man theih loh. Suspend order pawh hi a hna aṭanga bànna ni loin, a Commandant hna chawlhsan hrih tura tihna chauh a ni," a ti.
Ukil pahnihte thusawi leh dan hrang hrangte a en hnuah District & Session Judge chuan, mipui venghim tura ngaihte thil sual tihnaa inhnamhnawiha puh an ni chu thil serious tak a nih thu a sawi a, bail dilna chu a hnâwl.
Court-in order a tihchhuah hnuah police-te chuan Col. Jasjit Singh chu man nghalin, Aizawl Police Station-ah an hruai ta a ni.He thubuai kaihhnawihah hian police-te chu AR mi leh sa pakua leh civil mi pali an man tawh a; civil mi pahnih chu jail-ah dah niin, a bak zawng thu zawhfiah atan an la kawl.
Civil mi jail tángte chu - Lal-muanawma Mathipi, Zonuam, Aizawl leh Bulaki Chand Baid, Laipuitlang, Aizawl te an ni a; thu zawhfiah atana kawlte chu - Lalrosiama, Kanan leh Zobiakkima, Luangmual te an ni. Lalmuanawma Mathipi leh Bulaki Chand Baid-te hian nimin khan bail an dil a, mahse District & Session Court chuan an dilna hi a hnawl.
Assam Rifles mi leh sa an mante chu - Col. Jasjit Singh bakah, Sub. KC Roy, Hav. Ganesh Mahto, Hav. Balbir Singh, Hav. L John Singh, rifleman pali - Ramnunsanga, Lalfakawma, Pachhunga leh S Madhu te an ni.
