6th June, 2016 (MSR) : Assam Rifles mite’n rangkachak phur motor an suam thubuai chu Mizoram sorkar chuan CBI kutah hlan turin thutlukna a siam fel tawh.
Insuam thubuai CBI pek rawtna hi May ni 27 khan DGP chuan Home department-ah a thawn a. Home Secretary atanga chunglamah kalin Home Minister leh Chief Minister-in an
pawmpui tawh nia hriat a ni. Home Minister Pu R. Lalzirliana chuan he file hi vawiin, Thawhtanni-ah hian tih chhuah a nih dawn thu amah kawmtu media te a hrilh a, mahse, CBI in an chhui duh dawn leh dawn loh erawh chu Mizoram sorkarin a sawilawk theilo niin a sawi a ni.
Sorkarin he thubuai chhui tura abik taka a din Special Investigation Team (SIT) hian thui tak an chhui tawh a. 39th Assam Rifles Commandant chawlhtir tak Colonel Jasjit Singh leh a hote 9 man an ni a; an ni bakah hian civil mi pali man an ni tawh bawk. SIT te chhuina atanga a lan danin nikum December ni 14 khan Assam Rifles mi ralthuam kengte hian rangkachak tlang 52 (cheng vaibelchhe 14 leh nuai 5 man hu) phurtu Mahindra TUV300 chu Aizawl chhim lam Melthum piaha Zampuimanga lungphun bulah an suam a. A suamtu sipaite hian a tuk December ni 15-ah an Commandant Col. Jasjit Singh hnenah an rangkachak suam te chu an hlan niin a lang.
Chuti chung chuan Col. Singh hian he thil thleng hi la pha zui zel a, rangkachak a dahna a sawi duh bawk si loh avangin a chhuitute hian harsatna an tawk ta a ni. Dawt a sawi leh sawiloh hriatna khawl (Polygraph) bakah thil chhuina hmanraw dang an neih loh avangin CBI kuta hlan mai hi Police hotute chuan an rawt ta nia thudawn a ni.
He thila inhnamhnawiha puh Col. Singh bakah MZP hruaitu hlui leh rangkachak tawlhruknaa inhnamhnawih ve thin nia puh Pu Lalmuanawma Mathipi leh a mi chhawr nia hriat Pu Joseph Lalrosiama leh hnamdang sumdawng Bulaki Chand Baid te chu man an nih hnuah chhuanlam hrang hrang vangin bail-in chhua leh mek an ni hlawm.
