Mizo hmeichhia mai nilo North East hmeichhe zinga eizawnna atana
motor khalh hmasa ber leh la awmchhun ni a hriat North Vanlaiphai nula
Sapramchhani Ralte chuan tunah hian ama lirthei Maxi Cab, Aizawl -
Guwahati Service a khalh mek.
Nl.
Sapramchhani (42) d/o Laizika Ralte, North Vanlaiphai Rahsi Venga khawsa
hi North East pumhuap-ah pawh eizawnna atana lirthei khalh hmasa ber
leh la awmchhun ni a hriat a ni a, tunah hian an chhungkua hi North
Vanlaiphai-ah hian an khawsa a, a nu leh pa te pawhin an la dampui a ni.
Amah Nl Sapramchhanin ZAWLBUK a hrilh danin, kum 2004 ah Driving
Lisence Serchhip district atangin a nei tih a sawi a, anmahni Sumo MZ
-01 J 4180 'RK Mama' chu driver la in Aizawl - Guwahati an service tir
thin a, anmahni sumo Aizawl -Guwahati service ah hian tum 79 zet a zin
tawh tih sawiin, ama khalh takah chuan Aizawl - Guwahati hi tum 5 a tlan
tawh niin a sawi.
Nl Sapramchhani chuan nikum kumtawp lama
Guwahati atanga Aizawl a rawn tlan hmasak ber tum chuan a nuta pahnih
boral tawhte hrechhuakin a mittui a tla hial tih a sawi a, "Ka tlan
hmasak ber ni atangin hmeichhe khalh a nih vanga engmah hlau chuanglo in
hlim hmel pu tak chungin passenger te an chuang a, hei hian keimahah
pawh inrintawkna min pe nasa hle," a ti.
North East hmeichhe
zinga eizawnna atana lirthei khalh hmasa ber leh la awmchhun ni a hriat
Nl Sapramchhani hian hmeichhia a nih vangin passenger-ah engmah harsatna
a tawh phah loh thu leh, a passenger tam tak te phei chuan zu rui
chunga lirthei khalh mipa lamah an tam thin vangin a khalh a chuan
hahdamthlak an tih thu amah pawh an hrilh fo thin niin a sawi. Hetihlai
hian Assam Police leh Meghalaya Police te lakah erawh harsatna a tawk fo
thin niin a sawi a, hemi vang leh kalkawnga motor chhiat thutte awm
thei a nih vangte, kawng a thui tham deuh vangin 2nd driver a hruai ziah
thin niin a sawi.
ZAWLBUK zawhna chhangi Nl Sapramchhani chuan
eizawnna atana hmeichhia in lirthei khalh a kawng thui tak a zawh thei
chu Pathian malsawmna ropui tak a nih a sawi a, tuna a hun tawn mek chu
mite ngaihah ropui lua lo mah se, Pathian malsawmna a chunga thleng a
nih vangin a hun tawn mekah Pathian ropui ber se a duh tih a sawi.
Nl Sapramchhani hi North East hmeichhe zinga eizawnna atana lirthei
khalh hmasa ni a hriat a nih mai bakah hian India ram pum-ah pawh amah
anga kawng thui tak zawh a eizawnna atana lirthei khalh hi anla awmlo
hial ni a hriat a ni bawk.
- Zawlbuk News Service (ZNS)
